डॉ. ए.पी.जे. अब्दुल कलाम जन्मदिनानिमित्त कुरुंदवाडमध्ये 'कमवा आणि शिका' चा दिला विद्यार्थिनींनी संदेश

कुरुंदवाड / शिवार न्यूज नेटवर्क : 

भारताचे माजी राष्ट्रपती स्व. डॉ. ए.पी.जे. अब्दुल कलाम यांच्या जयंतीनिमित्त काल शनिवार रोजी कुरुंदवाड येथील न्यू इंग्लिश स्कूल फॉर गर्ल्सच्या विद्यार्थिनींनी आपल्या अध्यापकासोबत शहरात फिरून 'कमवा आणि शिका' याचा संदेश देत, डॉक्टर कलाम यांनी उभ्या आयुष्यात घेतलेल्या कष्टाचा आदर्श समाजासमोर उभा करण्याचा प्रयत्न केला. या अनोख्या उपक्रमाचे शहरातून स्वागत होत होते. 

       13 ऑक्टोंबर हा भारताचे माजी राष्ट्रपती स्व. ए.पी.जे. अब्दुल कलाम यांचा जन्मदिवस. याचे औचित्य साधून येथील न्यू इंग्लिश स्कूल फॉर गर्ल्सच्या विद्यार्थिनींनी मुख्याध्यापिका सौ. सुवर्णा यादव, सहाय्यक शिक्षिका सौ. शोभा कदम, शिक्षक संजयकुमार ऐनापुरे,तिर्थराज पाटील,सुनीता पासोबा, तेजश्री कनवाडकर, यांच्या मार्गदर्शनाखाली विद्यार्थिनी रिया हरिदारे, झेबा रोडे, रसिका चव्हाण, वैशाली देसाई, साक्षी पोवार, जेवेरिया सारवान, अक्षरा डांगे, ऋतुजा गावडे यासह अनेक मुलींनी कुरुंदवाड शहरातून घरोघरी जाऊन 'कमवा आणि शिका, कष्ट घ्या, तरच जीवनात यशस्वी व्हाल, हा राष्ट्रपती डॉ. एपीजे अब्दुल कलाम यांचा संदेश देत होत्या. यावेळी येथील कुंभार गल्लीत सौ. हेमांगी पाटील, सौ. सुरेखा बिडकर, सौ. मीनाक्षी जिवाजे, वर्षा घारगे,सौ. मुग्धा जमदग्नी या महिलांनी या मुलींचे स्वागत केले. यानंतर एपीजे अब्दुल कलाम यांचा जन्मदिन म्हणजेच 'वृतपत्र एजंट विक्रेता दिन' असा साजरा केला जातो. याचे औचित्य साधून या मुलीनी कुरुंदवाड येथील ज्येष्ठ वृत्तपत्र विक्रेते नागेश गायकवाड (उपाध्यक्ष शिरोळ तालुका अंक विक्रेता संघ) यांच्या वृतपत्र विक्रेत्या स्टॉलला भेट देऊन पुष्पगुच्छ देत त्यांचा सत्कार केला.