शिवार न्यूजची दखल – अखेर हेरवाडमधील जीवघेणा खड्डा बुजवला!

हेरवाड / शिवार न्यूज नेटवर्क :

हेरवाड-सलगर रस्त्याचे काम पूर्ण झाल्यानंतरही किरकोळ अपूर्ण कामांमुळे वाहनचालकांना मोठ्या अडचणींचा सामना करावा लागत होता. हेरवाड येथील गायकवाड गल्लीजवळील रस्त्यावर पडलेल्या मोठ्या खड्ड्यामुळे वारंवार अपघात होत होते, ज्यामध्ये अनेक वाहनचालक जखमी झाले होते.

रस्ता पूर्ण झाल्यानंतर काहीच दिवसांत येथे मोठा खड्डा पडल्यामुळे दुचाकीस्वार आणि अन्य वाहनधारकांसाठी धोकादायक परिस्थिती निर्माण झाली होती. हा खड्डा चुकवताना अनेक दुचाकीस्वार अपघातग्रस्त झाले. स्थानिक नागरिक व वाहनधारकांनी वारंवार तक्रारी केल्या तरी प्रशासनाकडून कोणतीही ठोस कारवाई केली जात नव्हती.

या गंभीर समस्येची शिवार न्यूज नेटवर्कने दखल घेत वृत्त प्रसिद्ध केल्यानंतर संबंधित विभागाने तातडीने कारवाई करत हा जीवघेणा खड्डा बुजवला.