हेरवाडमध्ये ४ नोव्हेंबरला तंटामुक्त अध्यक्ष निवड

हेरवाड / शिवार न्यूज नेटवर्क :

मौजे हेरवाड (ता. शिरोळ) ग्रामपंचायतीची सर्वसाधारण ग्रामसभा मंगळवार, दिनांक ४ नोव्हेंबर २०२५ रोजी सकाळी ११.३० वा. ग्रामपंचायत कार्यालयात आयोजित करण्यात आली आहे. या सभेस सर्व ग्रामस्थांनी उपस्थित राहावे, असे आवाहन ग्रामपंचायतीतर्फे करण्यात आले आहे.

सभेत शासनाच्या विविध परिपत्रकांचे वाचन, २०२६-२७ चे अंदाजपत्रक, प्रधानमंत्री आवास योजना, सामाजिक अंकेक्षण, १५ वा वित्त आयोगाचा आराखडा, साथरोग प्रतिबंधात्मक उपाययोजना आणि मुख्यमंत्री समृद्ध पंचायतराज अभियान या विषयांवर चर्चा होणार आहे.

दरम्यान, महात्मा गांधी तंटामुक्त समितीच्या अध्यक्षपदाची निवड व समिती पुनर्गठन हा या ग्रामसभेतील प्रमुख विषय ठरणार आहे. इच्छुक उमेदवारांनी दि. ३ नोव्हेंबर २०२५ रोजी दुपारी २ वाजेपर्यंत ग्रामपंचायतीकडे आपले अर्ज सादर करावेत. अर्जासोबत कुरुंदवाड पोलीस ठाण्याचा वर्तणुकीचा दाखला जोडणे अनिवार्य आहे, असे सूचनापत्रात स्पष्ट करण्यात आले आहे.

ग्रामपंचायत सरपंच व ग्रामसेवक यांच्या परवानगीने आयत्यावेळी उद्भवणाऱ्या विषयांवरही सभेत विचार केला जाणार आहे. गावाच्या विकास, पारदर्शकता आणि शांतीसाठी ही ग्रामसभा महत्त्वाची ठरणार असल्याने नागरिकांनी उपस्थित राहण्याचे आवाहन करण्यात आले आहे.